Mokurset er eit sommarkurs i folkemusikk for barn og unge. Kurset går over ei veke på Mo i Førde kvart år, og det blir undervist i slåttelære og speleteknikk på mellom anna hardingfele, fele, song, trekkspel og toradar. I tillegg får elevane undervising i støttefag som folkemusikkhistorie, samt at alle får delta i dans og song.

Elevane får dessutan velje mellom fleire valfag, som t.d. samspel, arrangering, drama, munnharpe, halling, m.m.

Undervisinga føregår i grupper på ulike nivå, men elevane får også individuelle timar tilpassa den enkelte sitt behov. Det er også noko fellesundervising for alle elevane på kurset.

Elevane får i løpet av Mokurset delta på fleire konsertar og tilstellingar, og får såleis lære om sceneframferd og det å frigjere seg som musikar på ei scene.

Dei siste åra har det vore ein instrumentmakar tilstade på kurset for å hjelpe elevane med instrumentvedlikehald.

Mokurset er ein musikalsk og sosial møtestad for unge folkemusikkutøvarar, og kombinerer miljøskapande aktivitetar med eit aktivt og inkluderande læremiljø med undervising på hovudinstrument og i støttefag som aukar instrumentferdigheiter og kunnskap om folkemusikken generelt. Mokurset tener som ei inspirasjonskjelde for arbeidet med folkemusikken, og er for mange eit høgdepunkt i året!

I tillegg til dei ordinære spelekursa for barn og unge, har ein dei siste åra også hatt kurstilboda Storspel (for vidarekomne), Samspel (for dei som ønskjer å utvikle seg som ensemblemusikarar og arrangere musikk), og Dans (for vidarekomne) for dei litt eldre og vaksne.

Mokurset er arrangert av Sogn og Fjordane folkemusikklag, men er ope for elevar frå heile landet. Minstealder for å delta er 10 år, og du må ha spelt eller sunge i minimum 2 år. Mokurset blir halde på Mo og Jølster vgs på Mo i Førde. Både elevar og lærarar bur på skulen sitt internat under opphaldet, og alle måltid blir servert i skulen sin matsal.

Mokurset har eksistert sidan 1984 og er såleis det eldste sommarkurset i folkemusikk i landet. I starten låg deltakartalet på om lag 40 elevar, men kurset etablerte seg raskt som eit populært tiltak og fekk ein stor auke i deltakartalet. I starten på 1990-talet var deltakartalet opp i 130 elevar, og det vart nokre år arrangert to kurs for å gje alle eit tilbod. Mokurset har no stabilisert seg med eit deltakartal på om lag 80 elevar.

Sidan starten har Mokurset hatt over 2 000 elevar, og desse har hovudsakleg kome frå Norge og Vestlandet. Men det har også vore deltaking frå Sverige, Storbritannia, Tyskland og USA. Mokurset har sidan starten satsa på å leige instruktørar frå øverste hylle, og opp gjennom åra har musikarar som Annbjørg Lien, Jon Faukstad, Håkon Høgemo, Gjermund Larsen og Leif Rygg blant instruktørane.

Mange tidlegare elevar på Mokurset har i dag etablert seg som profesjonelle musikarar, og blant utøvarar frå Sogn og Fjordane finn ein namn som Sigrid Moldestad, Unni Løvlid, Synnøve S. Bjørset, Gro Marie Svidal, men også Andreas Ljones, Jorun Marie Kvernberg og Ola Kvernberg som tilreisande frå andre fylke. Det er også fleire tidlegare elevar som er under utdanning i folkemusikk ved ulike universitet og høgskular.